ఆంధ్రప్రదేశ్, తెలంగాణ టైపరైటింగ్ పరీక్ష, హయ్యర్ గ్రేడ్

మ - అది మహాస్మశానము. గంగయొడ్డున నున్నది. గొ - బాబో! నన్ను గంగయొడ్డుననున్న స్మశానములోనికి రమ్మంటివా? మ - దాని పేరేకాని స్మశానముకాదు. పెద్దపట్టణము. గొ - అక్కడకు వెళ్ళడ మెందుకు ? మ - అది మహాపుణ్యభూమి! అక్కడకుబోయి గంగలో స్నానమాచరించి విశ్వనాథుని దర్శించి యొకరాత్రి వసించినను మరుసటి జన్మమునకు మహారాజై పుట్టుదురు. గొ - ఎవరు వెళ్ళినానా ? మ - మనుష్యులు పక్షులు పురుగులు మృగములు మొదలైనవికూడ గంగలో మునిగినంత ముక్తినొందును. గొ - అక్కడనుంచేనా కాశీకావిడి తీసుకొనివచ్చి ముష్టెత్తుకొనేవాళ్ళు డబ్బిస్తే కాశీపట్టణము జూపించెదరు? మ - ఔను వారలు యాత్ర చేసినవారే. గొ - అలాగైతే దాని పుట్టుపూర్వోత్తరమంతా చెప్పుము. విన్నపిమ్మట నాకు బాగున్నదని తోచిన వచ్చెదనని చెప్పుతాను. లేకపోతే రానని చెప్పుతాను. మ - (ఆ మాటను వినినంత సంతోషించి వానిదరికి జేరి యక్కడనున్న మర్రిచెట్టునీడం గూర్చుండబెట్టి) దాని పూర్వోత్తరమును సంక్షేపముగా జెప్పెదను గాని నీ విదివర కేమైనా కథలు వినియున్నావా? గొ -- ఏమిటో పాండవకథంటే పందికథంటే మరి కామమ్మకథంటే యిలాటివే కాని మరి వినలేదు. మ - నేను చెప్పినది నీవు జ్ఞాపకము వుంచుకోగలవా? గొ - నాకు కథలంటే మహాయిష్టము. తెలిసేలాగున చెప్పితే జ్ఞాపకముంచుకోగలను గాని గొదవలును పెద్దమాటలుగాను చెప్పకుము. మ - అలాగునేయని యతని శిరముమీద దనహస్త మిడి వానికి గ్రహణశక్తి పూర్ణముగా గలిగించి యక్కథ నిట్లని చెప్పందొడంగెను. గోపా! వినుము. తొల్లి త్రిలోకసంచారియగు నారదుండు తీర్థయాత్రకు వెడలి యనేక పుణ్యస్థలంబుల కరిగి యరిగి యందలితరంగిణుల నవగాహంబు సేయుచు నొక్కనాడు వింధ్యాచలోపాంతకాంతారంబుదరియం జొచ్చె. అదియు నుద్యానవనంబువోలె గమనీయభూరుహలతావృతంబై యొప్పుటం జేసి యమ్ముని స్వాంతంబునకు విశ్రాంతి గలుగజేసినది. పదంపడి యమ్మునియు నర్మదానదిం గృతావగాహుండై మధురఫలరసాస్వాదనమత్తశుకపికస్వానగానంబునకు దానంబులగు మరందబిందుపానాలోలరోలంబనాదంబులు చెవుల కింపు జనింపజేయ నడచు నజ్జడదారి రాక యెరింగి వింధ్యాచలేంద్రుడు జంగమరూపంబున నెదురేగి యర్ఘ్యపాద్యాదివిధుల నమ్మహానుభావు నర్చించి విశ్రయించియున్న కొండొకవడి కిట్లనియె. స్వామీ మునీంద్రా! నా కొక్కసందియంబు గలదు. వక్కాణింపుడు. లోకంబున లెక్కకురాని మెట్ట లెన్నియేం గలవు. వానిం బాటింప నేటికి మేటియని పేర్కొనువానిలో హాటకాచలంబును నేనుంగదా మేటులమై యుంటిమి. పక్షపాతంబు మాని మా యిద్దరకుంగల తారతమ్యంబు వక్కాణింప మీరలు సమర్థు లని యడిగిన నజ్జడదారి యెక్కింతసే పూరకుండి శిరఃకంపంబుతో నుస్సు రని యిట్లనియె.